ແມ່ຍິງໃນ ສປປ ລາວ
ແມ່ຍິງແມ່ນມີບົດບາດສຳຄັນຕໍ່ກັບການພັດທະນາເສດຖະກິດຂອງ ສປປ ລາວ.
ໃນຂະນະທີ່ ສປປ ລາວ ໄດ້ມີການພັດທະນາໃນຫຼາຍຂະແໜງການທີ່ຕິດພັນກັບການພັດທະນາດ້ານເສດຖະກິດຢ່າງໂດດເດັ່ນ, ແຕ່ກໍ່ຍັງມີຊ່ອງຫວ່າງຂອງຄວາມສະເໝີພາບຍິງ-ຊາຍຢູ່ໃນຫຼາຍຕົວຊີ້ວັດ ໂດຍສະເພາະແມ່ນດ້ານການສຶກສາ, ອັດຕາການຮູ້ໜັງສື ແລະ ການມີສ່ວນຮ່ວມທາງທຸລະກິດ. ປັດໄຈຕ່າງໆເຫຼົ່ານີ້ແມ່ນມີຄວາມສະຫລັບຊັບຊ້ອນ ແລະ ອາດຈະເກີດຈາກການຈັດຕັ້ງປະຕິບັດຕົວຈິງ ທີ່ບໍ່ສອດຄ່ອງກັບກົດໝາຍ/ນິຕິກຳ.
ແທ້ຈິງແລ້ວ, ບົດບາດຍິງ-ຊາຍໃນ ສປປ ລາວ ຖືວ່າຈັດຢູ່ໃນລຳດັບທີ່ດີໂດຍອີງໃສ່ຕົວຊີ້ວັດທາງດ້ານກົດໝາຍ ແລະ ກົດລະບຽບຕ່າງໆ, ເຊິ່ງຊີ້ບອກວ່າກົດໝາຍໃນ ສປປ ລາວ ເກືອບທັງໝົດແມ່ນຖືວ່າສະເໝີພາບທາງດ້ານບົດບາດຍິງ-ຊາຍ. ເຖິງຢ່າງໃດກໍ່ຕາມ, ແມ່ຍິງ ແລະ ຜູ້ຊາຍມີທ່າອ່ຽງທີ່ຈະສຸມໃສ່ໃນຂະແຫນງການທີ່ແຕກຕ່າງກັນ, ປະກອບພ້ອມໄປດ້ວຍລະດັບການສຶກສາ ແລະ ທັກສະທີ່ບໍ່ສະເໝິກັນ, ການເຂົ້າເຖິງເຄືອຂ່າຍ ແລະ ຂໍ້ມູນຂ່າວສານທີ່ແຕກຕ່າງກັນ ແລະ ຄວາມຮັບຜິດຊອບທາງດ້ານວັດທະນະທໍາ/ຄອບຄົວທີ່ຕ່າງກັນ, ເຊິ່ງມີທ່າອ່ຽງນໍາໄປສູ່ລະດັບການມີສ່ວນຮ່ວມເຂົ້າໃນເສດຖະກິດທີ່ແຕກຕ່າງກັນ ລະຫວ່າງແມ່ຍິງ ແລະ ຜູ້ຊາຍ
ສປປ ລາວ ມີຂອບ ແລະ ລະບົບກົດໝາຍ ທີ່ເຂັ້ມແຂງ ເພື່ອສະໜັບສະໜູນຄວາມສະເໝີພາບລະຫວ່າງຍິງ-ຊາຍ. ຢ່າງໃດກໍ່ຕາມ, ໃນຂະນະທີ່ກົດຫມາຍ ແລະ ນະໂຍບາຍແມ່ນຂ້ອນຂ້າງບໍ່ລຳອຽງກ່ຽວກັບບົດບາດຍິງຊາຍ, ຜົນໄດ້ຮັບທີ່ຕາມມາແມ່ນມີຄວາມແຕກຕ່າງກັນລະຫວ່າງຜູ້ຊາຍ ແລະ ແມ່ຍິງ. ໂດຍສະເລ່ຍແລ້ວ, ແມ່ຍິງໃນ ສປປ ລາວມີທ່າອ່ຽງທີ່ຈະສະແດງອອກເຖິງລະດັບການຮູ້ໜັງສື ແລະ ຜົນສຳເລັດດ້ານການສຶກສາທີ່ຕໍ່າກວ່າ. ຄວາມແຕກຕ່າງອັນນີ້ແມ່ນກວ້າງຂຶ້ນເມື່ອທຽບໃສ່ແມ່ຍິງຢູ່ເຂດນອກນະຄອນຫຼວງວຽງຈັນ. ໃນຂະນະດຽວກັນ, ຜູ້ປະກອບການຍິງໃນ ສປປ ລາວ ມີທ່າອ່ຽງທີ່ຈະສຸມໃສ່ໃນວິສາຫະກິດທີ່ນ້ອຍກວ່າ, ມຸ່ງໄປໃນຂົງເຂດການບໍລິການ, ມີຄວາມແຕກຕ່າງກັນໃນການເປັນຕົວແທນຢູ່ໃນແຕ່ລະພາກ ແລະ ມີສ່ວນຮ່ວມໃນການຄ້າໃນລະດັບໃດໜຶ່ງ ສ່ວນຜູ້ຊາຍມີທ່າອ່ຽງທີ່ຈະແນໃສ່ຂະແໜງການການກໍ່ສ້າງ, ການຂົນສົ່ງ ແລະ ຄຸ້ມຄອງສາງ, ພະລັງງານໄຟຟ້າ ແລະ ການຂຸດຄົ້ນບໍ່ແຮ່ຫຼາຍກວ່າ, ກໍ່ຄືວິສາຫະກິດຂະຫນາດກາງ ແລະ ໃຫຍ່.
ກະຊວງອຸດສາຫະກຳ ແລະ ການຄ້າ (ກຊອຄ) ມີຄວາມໝາຍໝັ້ນຈະແກ້ໄຂບັນດາສິ່ງທ້າທາຍສະເພາະທີ່ກະທົບເຖິງວິສາຫະກິດ ທີ່ນັກທຸລະກິດຍິງເປັນເຈົ້າຂອງ ແລະ ບໍລິຫານ, ໂດຍຜ່ານການສະໜັບສະໜູນການຈັດຕັ້ງປະຕິບັດບັນດານະໂຍບາຍ ແລະ ວຽກງານຕ່າງໆທີ່ເປັນໄປໄດ້ ເພື່ອຫລຸດຜ່ອນບັນດາຂໍ້ຈຳກັດດັ່ງກ່າວ ແລະ ບັນເທົາຜົນກະທົບອັນຫຍໍ້ທໍ້ທີ່ອາດເກີດຂຶ້ນຈາກການເຄື່ອນໄຫວທາງເສດຖະກິດທີ່ເພີ່ມຂືຶ້ນຕໍ່ກັບຄວາມສະເໝີພາບລະຫວ່າງຍິງ-ຊາຍ.
ເວັບໄຊນີ້ຈະເປັນອີກຊ່ອງທາງໜຶ່ງໃນການສົ່ງເສີມການດຳເນີນທຸລະກິດຂອງນັກທຸລະກິດຍິງໃຫ້ຫຼາຍຂຶ້ນດ້ວຍການສົ່ງເສີມຄວາມໂປ່ງໃສ ແລະ ປະສິດທິຜົນຕໍ່ກັບການເຂົ້າເຖິງບັນດາກົດໝາຍ ແລະ ນິຕິກຳຕ່າງໆທີ່ກ່ຽວຂ້ອງກັບການດຳເນີນທຸລະກິດໃນ ສປປ ລາວ.
ຄູ່ຮ່ວມມື
