ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ແລະ ການຈັດຕັ້ງ ທີ່ມີຈຸດປະສົງນຳໃຊ້ ແລະ ຕິດຕັ້ງປ້າຍເພື່ອບົ່ງບອກ, ເພື່ອສຶກສາອົບຮົມ ຫຼື ໂຄສະນາດ້ວຍປ້າຍພິມ, ປ້າຍເອເລັກໂຕນິກ, ປ້າຍຂຽນ, ແຕ້ມ, ປັ້ນ, ຫຼໍ່, ຄວັດ ຫຼື ແກະສະລັກ

1. ປ້າຍທຸກປະເພດທີ່ມີຈຸດປະສົງນຳໃຊ້ຢູ່ໃນ ສປປ ລາວ ຕ້ອງເປັນພາສາລາວ, ມີເນື້ອໃນທີ່ຖືກຕ້ອງ ຊັດເຈນ ແລະ ຖືກຕາມຫຼັກໄວຍາກອນພາສາລາວ
ສຳລັບປ້າຍທີ່ຂຽນ ຫຼື ພິມພາສາລາວ ແລະ ຕ່າງປະເທດນັ້ນໃຫ້ໃສ່ພາສາລາວຢູ່ເທິງ, ພາສາຕ່າງປະເທດຢູ່ລຸ່ມ ຫຼື ພາສາລາວຢູ່ເບື້ອງຂວາ, ພາສາຕ່າງປະເທດຢູ່ເບື້ອງຊ້າຍ,ຂະໜາດຕົວໜັງສືຕ່າງປະເທດບໍ່ໃຫ້ໃຫຍ່ເກິນ 2/3 ຂອງຕົວໜັງສືລາວ
2. ສີພື້ນ, ຕົວໜັງສື ແລະ ຂະໜາດຂອງປ້າຍຕ້ອງສອດຄ່ອງກັບປະເພດຂອງປ້າຍຕາມທີ່ໄດ້ລະບຸໄວ້ໃນ ກົດໝາຍວ່າດ້ວຍປ້າຍ.

ໝາຍເຫດ: ໃນກໍລະນີທີ່ມີຈຸດປະສົງເຮັດປ້າຍໃຫ້ມີສີສັນ ແລະ ເອກະລັກສະເພາະຂອງຕົນໃຫ້ໄປຂໍອະນຸຍາດນຳ ຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວຕາມການແບ່ງຂັ້ນຄຸ້ມຄອງ. 

1. ການກວດກາເນື້ອໃນ ແລະ ຮູບແບບປ້າຍທຸກປະເພດປ້າຍໂຄສະນາ ນັບແຕ່ສອງແຂວງຂຶ້ນໄປໃນຂອບເຂດທົ່ວປະເທດແມ່ນ ກະຊວງ ຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ເປັນຜູ້ຄຸ້ມຄອງ. (ນອກຈາກປ້າຍຈະລາຈອນ ແລະ ປ້າຍຂອງສໍານັກງານຜູ້ຕາງໜ້າຂອງຕ່າງປະເທດ ແລະ ອົງການຈັດຕັ້ງສາກົນ ຢູ່ ສປປ ລາວ ລວມທັງເຮືອນພັກຂອງຫົວໜ້າສໍານັກງານດັ່ງກ່າວ ໃຫ້ປະຕິບັດຕາມສົນທິສັນຍາ ແລະ ສັນຍາສາກົນ ທີ່ກ່ຽວຂ້ອງ ຊຶ່ງ ສປປ ລາວ ເປັນພາຄີ) 
2. ການກວດກາ ເນື້ອໃນປ້າຍ ແລະ ຮູບແບບປ້າຍທຸກປະເພດ ແລະ ປ້າຍທຸລະກິດຕ່າງໆ ຂັ້ນແຂວງ, ນະຄອນຫຼວງ ໃຫ້ສະເໜີຕໍ່ພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ຂອງແຂວງ, ນະຄອນຫຼວງ; 
3. ການກວດກາ ເນື້ອໃນປ້າຍ ແລະ ຮູບແບບປ້າຍທຸກປະເພດ ຂັ້ນເມືອງ  ໃຫ້ສະເໜີຕໍ່ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ, ເທດສະບານ 
4. ການກວດກາ ເນື້ອໃນປ້າຍ ແລະ ຮູບແບບປ້າຍງານບຸນ ແລະ ກິດຈະກໍາ ທີ່ມີລັກສະນະຊົ່ວຄາວພາຍໃນປ້າຍຂອງຕົນ ໃຫ້ສະເໜີຕໍ່ອົງການປັກຄອງບ້ານ ເປັນຜູ້ຄຸ້ມຄອງ.