ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ມີຈຸດປະສົງເພື່ອສ້າງຕັ້ງສາຂາຈຳໜ່າຍຢາ ແລະ ຜະລິດຕະພັນການແພດໃຫ້ແກ່ບໍລິສັດແມ່(ບໍລິສັດຂາເຂົ້າ-ຂາອອກ) ທີ່ຜະລິດຕະພັນໄດ້ຂື້ນທະບຽນ ຫລື ຈົດແຈ້ງແລ້ວ.

1. ຕ້ອງມີເພສັດຊະກອນ ຫຼື ຜູ່ຊ່ວຍເພສັດຊະກອນ (ການຢາຊັ້ນກາງ) ທີ່ເປັນຄົນສັນຊາດລາວ ຊຶ່ງມີໃບປະກາດສະນີຍະບັດ ຫຼື ໃບຢັ້ງຢືນສຳເລັດການສຶກສາວິຊາຊີບເພສັດຊະກຳທີ່ອອກໃຫ້ໂດຍສະຖາບັນການສຶກສາທີ່ກ່ຽວຂ້ອງ ທັງພາຍໃນແລະຕ່າງປະເທດ ແລະ ໄດ້ຮັບອະນຸຍາດວິຊາຊີບເພສັດຊະກຳຈາກກະຊວງສາທາລະນະສຸກ ແລະ ຕ້ອງມີປະສົບການຮັບໃຊ້ວຽກງານການຢາ 4 ປີຂຶ້ນໄປ. ຖ້າແມ່ນພະນັກງານສັງກັດລັດຕ້ອງມີໃບແຕ່ງຕັ້ງຢ່າງເປັນທາງການ, ຕ້ອງແມ່ນຜູ່ທີ່ບໍ່ຢູ່ໃນໄລຍະຖືກດຳເນີນຄະດີ ຫຼື ປະລະໜ້າທີ່ ຫຼື ຖືກປະຕິບັດວິໄນຍ້ອນການຜິດພາດທາງດ້ານວິຊາຊີບເພສັດຊະກຳ ຫຼື ຄ້າຂາຍຢາເສບຕິດໃຫ້ໂທດ;
2. ສະຖານທີ່ດຳເນີນທຸລະກິດຂາອອກ-ຂາເຂົ້າ, ສາຂາບໍລິສັດ/ໂຮງງານ ແລະ ຕົວແທນຈຳໜ່າຍຕ້ອງສະອາດ, ມີເນື້ອທີ່ຢ່າງຕ່ຳ 20 ຕາຕະລາງແມັດຂຶ້ນໄປ, ເປັນຫ້ອງເຮືອນສະເພາະ, ບໍ່ປົນເປສະຖານທີ່ພັກເຊົາ ແລະ ບ່ອນຂາຍເຄື່ອງອື່ນໆ ທີ່ບໍ່ແມ່ນຢາ ຫຼື ຜະລິດຕະພັນການແພດ;
3. ຕ້ອງມີສະຖານທີ່ເກັບມ້ຽນສິນຄ້າທີ່ສະອາດ ແລະ ຖືກຕ້ອງຕາມມາດຕະຖານຢ່າງນ້ອຍຂະໜາດຄວາມກວ້າງ 4 ແມັດ, ຄວາມຍາວ 8 ແມັດ ແລະ ຄວາມສູງຕາມເໝາະສົມ, ມີລະບົບບັນຊີສາງ, ມີລະບົບປ້ອງກັນສັດແລະແມງໄມ້, ລະບົບປັບຄວາມເຢັນ, ແສງສະຫວ່າງ, ມີອຸປະກອນຕິດຕາມອຸນຫະພູມແລະຄວາມຊຸ່ມ, ພາຍໃນສາງຕ້ອງມີອຸປະກອນຮັບໃຊ້ທີ່ຈຳເປັນ, ມີຕູ້ເຢັນທີ່ມີອຸນຫະພູມສູງສຸດບໍ່ໃຫ້ເກີນ 2-8 ອົງສາເຊ ພ້ອມດ້ວຍເຄື່ອງວັດແທກອຸນຫະພູມໃນກໍລະນີທີ່ມີຢາຕ້ອງຮັກສາໄວ້ໃນຄວາມເຢັນເຊັ່ນ: ຢາຍັດທະວານ ຫຼື ຢາອື່ນໆ.

ພາຍຫຼັງທີ່ຂະແໜງອຸດສາຫະກຳ ແລະ ການຄ້າເປັນຜູ້ຄົ້ນຄວ້າອອກໃບທະບຽນວິສາຫະກິດ. ຈາກນັ້ນ, ກົມອາຫານ ແລະ ຢາ ກໍ່ຈະໄດ້ອອກໃບທະບຽນວິຊາຊີບເພສັດຊະກຳ ສໍາລັບສາຂາບໍລິສັດຢາ ແລະ ຜະລິດຕະພັນການແພດ ຕ້ອງໄດ້ຮັບການອະນຸມັດໂດຍ ກະຊວງສາທາລະນະສຸກ ດຳເນີນທຸລະກິດດ້ານຢາ ແລະ ຜະລິດຕະພັນການແພດທີ່ໄດ້ຂຶ້ນທະບຽນຂອງບໍລິສັດຂາເຂົ້າ-ຂາອອກ (ບໍລິສັດແມ່) ຢາ ແລະ ຜະລິດຕະພັນການແພດ.