ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ມີຈຸດປະສົງສ້າງຕັ້ງບໍລິສັດຂາອອກ-ຂາເຂົ້າ ດ້ານຢາ ແລະ/ຫຼື ຜະລິດຕະພັນການແພດ

1. ຕ້ອງມີເພສັດຊະກອນ ທີ່ເປັນຄົນສັນຊາດລາວ ຊຶ່ງມີໃບປະກາດສະນີຍະບັດ ຫຼື ໃບຢັ້ງຢືນສຳເລັດການສຶກສາວິຊາຊີບເພສັດຊະກຳທີ່ອອກໃຫ້ໂດຍສະຖາບັນການສຶກສາທີ່ກ່ຽວຂ້ອງ ທັງພາຍໃນແລະຕ່າງປະເທດ ແລະ ໄດ້ຮັບອະນຸຍາດວິຊາຊີບເພສັດຊະກຳຈາກກະຊວງສາທາລະນະສຸກ ແລະ ຕ້ອງມີປະສົບການຮັບໃຊ້ວຽກງານການຢາ 5 ປີຂຶ້ນໄປ. ຖ້າແມ່ນພະນັກງານສັງກັດລັດຕ້ອງມີໃບແຕ່ງຕັ້ງຢ່າງເປັນທາງການ, ຕ້ອງແມ່ນຜູ່ທີ່ບໍ່ຢູ່ໃນໄລຍະຖືກດຳເນີນຄະດີ ຫຼື ປະລະໜ້າທີ່ ຫຼື ຖືກປະຕິບັດວິໄນຍ້ອນການຜິດພາດທາງດ້ານວິຊາຊີບເພສັດຊະກຳ ຫຼື ຄ້າຂາຍຢາເສບຕິດໃຫ້ໂທດ; 
2. ສະຖານທີ່ດຳເນີນທຸລະກິດຂາເຂົ້າ-ຂາອອກ ມີເນື້ອທີ່ຢ່າງຕ່ຳ 20 ຕາລາງແມັດຂຶ້ນໄປ, ເປັນຫ້ອງເຮືອນສະເພາະ, ບໍ່ປົນເປສະຖານທີ່ພັກເຊົາ ແລະ ບ່ອນຂາຍເຄື່ອງອື່ນໆ ທີ່ບໍ່ແມ່ນຢາ ຫຼື ຜະລິດຕະພັນການແພດ; 
3. ຕ້ອງມີສະຖານທີ່ເກັບມ້ຽນສິນຄ້າທີ່ສະອາດ ແລະ ຖືກຕ້ອງຕາມມາດຕະຖານຢ່າງນ້ອຍຂະໜາດຄວາມກວ້າງ 6 ແມັດ, ຄວາມຍາວ 12 ແມັດ ແລະ ຄວາມສູງຕາມເໝາະສົມ, ມີລະບົບບັນຊີສາງ, ມີລະບົບປ້ອງກັນສັດແລະແມງໄມ້, ລະບົບປັບຄວາມເຢັນ, ແສງສະຫວ່າງ, ມີອຸປະກອນຕິດຕາມອຸນຫະພູມແລະຄວາມຊຸ່ມ, ພາຍໃນສາງຕ້ອງມີອຸປະກອນຮັບໃຊ້ທີ່ຈຳເປັນ, ມີຕູ້ເຢັນທີ່ມີອຸນຫະພູມສູງສຸດບໍ່ໃຫ້ເກີນ 2-8 ອົງສາເຊ ພ້ອມດ້ວຍເຄື່ອງວັດແທກອຸນຫະພູມໃນກໍລະນີທີ່ມີຢາຕ້ອງຮັກສາໄວ້ໃນຄວາມເຢັນເຊັ່ນ: ຢາຍັດທະວານ ຫຼື ຢາອື່ນໆ (ປະຕິບັດຕາມຫຼັກການການຂາຍຍົກທີ່ດີ (Good Whole Selling Practic-GWP ແລະ ຫຼັກການການເກັບຮັກສາທີ່ດີ (Good Storage Practice)).

ພາຍຫຼັງທີ່ຂະແໜງອຸດສາຫະກຳ ແລະ ການຄ້າເປັນຜູ້ຄົ້ນຄວ້າອອກໃບທະບຽນວິສາຫະກິດ, ຈາກນັ້ນ, ກົມອາຫານ ແລະ ຢາ ກໍ່ຈະໄດ້ອອກໃບທະບຽນວິຊາຊີບເພສັດຊະກຳ ສໍາລັບບໍລິສັດຂາອອກ-ຂາເຂົ້າດໍາເນີນທຸລະກິດດ້ານຢາ ແລະ ຜະລິດຕະພັນການແພດເຊິ່ງຕ້ອງໄດ້ຮັບການອະນຸມັດໂດຍ ກະຊວງສາທາລະນະສຸກ ເພື່ອດຳເນີນທຸລະກິດ ດ້ານຢາ ແລະ ຜະລິດຕະພັນການແພດ