ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ, ນິຕິບຸກຄົນ ແລະ ການຈັດຕັ້ງທັງພາຍໃນ ແລະ ຕ່າງປະເທດ ທີ່ມີຈຸດປະສົງດຳເນີນທຸລະກິດດ້ານ ການນໍາເຂົ້າ ແລະ ສົ່ງອອກ ວັດຖຸມີຄ່າເຊັ່ນ: ເງິນ ແລະ ຄໍາ ທີ່ເປັນຮູບປະພັນ, ເພັດ, ໄຂ່​ມຸກ, ແກ້ວ​ປະ​ເສີດ, ຄຳ​ຂາວ ແລະ ເຄື່ອງ​ອື່ນໆ ​ທີ່​ເຮັດ​ດ້ວຍ​ໂລ​ຫ​ະ​ປະ​ເສີດ ​ຕາມ​ລະ​ຫັດອັດຕາພາສີ​​ (HS Code) 7102, 7103, 7104, 7110, 7111, 7113, 7114, 7115 ແລະ 7116 ​ຍົກ​ເວັ້ນ ​ຄຳແທ່ງ, ຄຳເມັດ, ເງິນແທ່ງ ແລະ ເງິນເມັດ ທີ່ບໍ່​ເປັນ​ຮູບ​ປະ​ພັນ ທີ່​ ທະ​ນາ​ຄານ​ແ​ຫ່ງ ສ​ປ​ປ ລາວ​ ຄຸ້ມ​ຄອງ ແລະ ຜະ​ລິດ​ຕະ​ພັນຈາກ​ແຮ່​ທາດ ​ທີ່​ ກະ​ຊວງ​ພະ​ລັງ​ງານ ແລະ ບໍ່​ແຮ່ ​ຄຸ້ມ​ຄອງ;

ການສະເໜີຂໍ​ໃບອະ​ນຸ​ຍາດ​ດຳເນີນທຸ​ລ​ະ​ກິດການນຳເຂົ້າ ແລະ ສົ່ງອອກວັດຖຸມີຄ່າ ແມ່ນໃຫ້ປະ​ກອບ​ເອກະສານ ສະເໜີ​ຕໍ່ກົມການນໍາເຂົ້າ ແລະ ສົ່ງອອກ ດັ່ງນີ້:

1. ໃບຄຳຮ້ອງຕາມແບບພິມ ທີ່ກົມການນໍາເຂົ້າ ແລະ ສົ່ງອອກ ໄດ້ກຳນົດ;
2. ສໍາເນົາໃບທະບຽນວິສາຫະກິດ ແລະ ສໍາເນົາຊຸດຄໍາຮ້ອງແຈ້ງຂຶ້ນທະບຽນວິສາຫະກິດ;
3. ເອກະສານລາຍງານການເຄື່ອນໄຫວບັນຊີທາງການເງິນ ຂອງຜູ້ດຳເນີນທຸລະກິດ ແລະ ຂາຮຸ້ນ ໄລຍະ ເກົ້າສິບ ວັນ ຢ້ອນຫຼັງ ຈາກທະນາຄານທຸລະກິດ ແລະ ໜັງສືຢັ້ງຢືນການເງິນຢູ່ທະນາຄານ ທີ່ສ້າງຕັ້ງຢູ່ ສປປ ລາວ.
4. ໃບແຈ້ງໂທດຂອງຜູ້ດຳເນີນທຸລະກິດ ແລະ ຂາຮຸ້ນ ຕາມເງື່ອນໄຂທີ່ກຳນົດໃນຂໍ້ 4 ມາດຕາ 5 ຂອງຂໍ້ຕົກລົງສະບັບນີ້.

ເງື່ອນໄຂໃນການສັ່ງໂຈະມີຄື: 
1. ຜູ້ດໍາເນີນທຸລະກິດບໍ່ປະຕິບັດ​ພັນ​ທະຕາມທີ່​ກຳ​ນົດ​ໄວ້​ໃນມາດຕາ 12 ຂອງຂໍ້ຕົກລົງ;
2. ຜູ້ດຳເນີນທຸລະກິດສະ​ເໜີ​ຢຸດ​ເຊົາການດຳ​ເນີນ​ທຸ​ລະ​ກິດດ້ວຍຄວາມສະໝັກໃຈ;
3. ມີ​ຄຳ​ຕັດ​ສິນ​ຈາກ​ສານ​ປະ​ຊາ​ຊົນ ໃຫ້​ລົ້ມ​ລະ​ລາຍ ຫຼື ໃຫ້ຢຸດເຊົາການດຳເນີນທຸລະກິດ ຕາມລະບຽບ ກົດໝາຍ.