ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ, ນິຕິບຸກຄົນ ທີ່ມີຈຸດປະສົງດໍາເນີນທຸລະກິດການທະນາຄານ 

ບຸກຄົນ, ນິຕິບຸກຄົນສາມາດເປັນຜູ້ຖືຮຸ້ນສ້າງຕັ້ງທະນາຄານທຸລະກິດໄດ້ ແຕ່ໃນນັ້ນຕ້ອງມີໜຶ່ງ ຫຼື ຫຼາຍທະນາຄານ ຖືຮຸ້ນສ້າງຕັ້ງຫຼາຍກວ່າ 50% ຂອງຈໍານວນຮຸ້ນທັງໝົດທີ່ສາມາດລົງຄະແນນສຽງໄດ້, ສໍາລັບບຸກຄົນ,ຜູ້ໜຶ່ງສາມາດຖືຮຸ້ນສ້າງຕັ້ງທະນາຄານທຸລະກິດ ໄດ້ບໍ່ເກີນ 10% ຂອງຈໍານວນຮຸ້ນທັງໝົດທີ່ສາມາດລົງຄະແນນສຽງໄດ້.
ຜູ້ຂໍສ້າງຕັ້ງທີ່ເປັນທະນາຄານ
1.	ການດໍາເນີນທຸລະກິດຕະຫຼອດໄລຍະ 3 ປີ ມີຜົນກໍາໄລຢ່າງຕໍໍ່ເນື່ອງ ແລະ ບໍ່ມີຂາດທຶນສະສົມ; 
2.	ຕ້ອງມີແຫຼ່ງທຶນພຽງພໍ, ຈະແຈ້ງ ແລະ ຖືຕ້ອງຕາມກົດໝາຍ ແລະ ມີຊັບສິນບໍ່ຫູຸດ 40 ພັນຕື້ກີບ ຫຼື ທຽບເທົ່າ  5 ຕື້ໂດລາສະຫະລັດ ໃນປີການເງິນທີ່ຂໍສ້າງຕັ້ງ; 
3.	ຕ້ອງໄດ້ຮັບການຈັດອັນດັບ BBB ຂຶ້ນໄປ ຈາກສະຖາບັນຈັດອັນດັບສາກົນ ຫຼື ໄດ້ຮັບການຈັດອັນດັບດີຈາກອົງການທີ່ມີສິດອໍານາດກ່ຽວຂ້ອງ; 
4.	ກໍລະນີຜູ້ຂໍສ້າງຕ້ັງເປັນທະນາຄານຈາກຕ່າງປະເທດ, ຕ້ອງໄດ້ຮັບອະນຸຍາດຈາກອົງການທີ່ມີສິດອໍານາດທີ່ກ່ຽວຂ້ອງ ໃນການລົງທຶນສ້າງຕັ້ງງທະນາຄານທຸລະກິດຢູ່ ສປປ ລາວ; 
5.	ມີໂຄງປະກອບຜູ້ຖືຮຸ້ນຂອງຕົນທີ່ຈະແຈ້ງ ແລະ ເປັນຈິງ; 
6.	ເປັນນິຕິບຸກຄົນທີ່ມີຄວາມເໝາະສົມໃນການໄດ້ຮັບໃບອະນຸຍາດດໍາເນີນທຸລະກິດ;
7.	ບໍ່ຢູ່ໃນບັນຊີດໍາກ່ຽວກັບການຟອກເງິນ ຫຼື ສະໜອງທຶນໃຫ້ແກ່ກໍ່ການຮ້າຍ
ຜູ້ຂໍສ້າງຕັ້ງທີ່ເປັນນິຕິບຸກຄົນທີ່ບໍ່ແມ່ນທະນາຄານ
1.	ການດໍາເນີນທຸລະກິດຕະຫຼອດໄລຍະ 3 ປີ ມີຜົນກໍາໄລຢ່າງຕໍໍ່ເນື່ອງ ແລະ ບໍ່ມີຂາດທຶນສະສົມ; 
2.	ຕ້ອງມີແຫຼ່ງທຶນພຽງພໍ, ຈະແຈ້ງ ແລະ ຖືຕ້ອງຕາມກົດໝາຍ ແລະ ບໍ່ຫຼຸດ ສອງ ເທົ່າຂອງມູນຄ່າຮຸ້ນທີ່ຈະຖືໃນທະນາຄານທີ່ຂໍສ້າງຕັ້ງໃນປີການເງິນທີ່ຂໍສ້າງຕັ້ງ; 
3.	ມີໂຄງປະກອບຜູ້ຖືຮຸ້ນຂອງຕົນທີ່ຈະແຈ້ງ ແລະ ເປັນຈິງ; 
4.	ເປັນນິຕິບຸກຄົນທີ່ມີຄວາມເໝາະສົມໃນການໄດ້ຮັບໃບອະນຸຍາດດໍາເນີນທຸລະກິດ; 
5.	ບໍ່ຢູ່ໃນບັນຊີດໍາກ່ຽວກັບການຟອກເງິນ ຫຼື ສະໜອງທຶນໃຫ້ແກ່ກໍ່ການຮ້າຍ

ຜູ້ຂໍສ້າງຕັ້ງທີ່ເປັນບຸກຄົນ
1.	ຕ້ອງມີແຫຼ່ງທຶນພຽງພໍ, ຈະແຈ້ງ ແລະ ຖືກຕ້ອງຕາມກົດໝາຍ ແລະ ບໍ່ຫຼຸດສອງເທົ່າຂອງມູນຄ່າຮຸ້ນທີ່ຈະຖືໃນການສ້າງຕັ້ງ ໃນປີການເງິນທີ່ຂໍສ້າງຕັ້ງ; 
2.	ກໍລະນີເປັນຜູ້ຖືຮຸ້ນລາຍໃຫຍ່ຕ້ອງມີຄຸນວຸດທິ ແລະ ປະສົບການເໝາະສົມກັບການດໍາເນີນທຸລະກິດດ້ານການເງິນ-ການທະນາຄານ; 
3.	ບໍ່ເຄີຍຖືສານຕັດສິນລົງໂທດທາງອາຍາໃນສະຖານລັກຊັບ, ສໍ້ໂກງ. ຍັກຍອກຊັບ, ປອມແປງເອກະສານ, ຮັບ ຫຼື ໃຫ້ສິນບົນ, ສໍ້ລາດບັງຫຼວງ, ການຟອກເງິນ, ການສະໜອງທຶນໃຫ້ແກ່ການກໍການຮ້າຍ ຫຼື  ການກະທໍາຜິດທາງອາຍາອື່ນທີ່ກ່ຽວຂ້ອງທາງດ້ານການເງິນ ແລະ ເງິນຕາ ຫຼື ການຄ້າຢາເສບຕິດ; 
4.	ເປັນບຸກຄົນທີ່ມີຄວາມເໝາະສົມໃນການໄດ້ຮັບໃບອະນຸຍາດສ້າງຕັ້ງ; 
5.	ບໍ່ຢູ່ໃນບັນຊີດໍາກ່ຽວກັບການຟອກເງິນ ຫຼື ສະໜອງທຶນໃຫ້ແກ່ການກໍ່ການຮ້າຍ.

ການຂໍສ້າງຕັ້ງທະນາຄານທຸລະກິດທີ່ເປັນສາຂາທະນາຄານທຸລະກິດຕ່າງປະເທດຕ້ອງມີເງິນລົງທຶນຕໍ່າສຸດ 300 ຕື້ກີບ.