ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ມີຈຸດປະສົງໃນການດຳເນີນກິດຈະການ ກ່ຽວກັບການອອກແບບ, ການຜະລິດ ແລະ ການຕິດຕັ້ງເນື້ອໃນກ່ຽວກັບປ້າຍ ຊຶ່ງແມ່ນ ຜະລິດຕະພັນສື່ປະເພດໜຶ່ງ ທີ່ສ້າງຂຶ້ນດ້ວຍ ໜັງສື, ຮູບພາບ, ຮູບແຕ້ມ, ການປັ້ນ, ການຫຼໍ່, ການຄວັດ ຫຼື ແກະສະຫຼັກ ແລະ ແສງສີ ເພື່ອບົ່ງບອກສະຖານທີ່, ເພື່ອສຶກສາອົບຮົມ ແລະ ໂຄສະນາ ໃຫ້ສັງຄົມໄດ້ຮັບຮູ້ ແລະ ເຂົ້າໃຈ.  

ຜູ້ທີ່ປະສົງຢາກຂໍອະນຸຍາດດຳເນີນທຸລະກິດກ່ຽວກັບປ້າຍຕ້ອງມີສະຖານທີ່ (ທີ່ຕັ້ງສຳນັກງານ), ບົດວິພາກເສດຖະກິດ-ເຕັກນິກ, ພາຫະນະ, ອຸປະກອນເຕັກນີກ, ທຶນຮອນທີ່ຮັບປະກັນການເຄື່ອນໄຫວວຽກງານຂອງຕົນ, ແລະ ຕ້ອງມີບຸກຄະລາກອນທີ່ມີຄວາມຮູ້ຄວາມສາມາດດ້ານວຽກງານປ້າຍ, ມີຈັນຍາບັນ ແລະ ຄຸນສົມບັດຕາມທີ່ໄດ້ກຳນົດໄວ້ໃນກົດໝາຍວ່າດ້ວຍປ້າຍ.

1. ການອອກໃບອະນຸຍາດ ກ່ຽວກັບ ການດໍາເນີນທຸລະກິດກ່ຽວກັບປ້າຍ ທີ່ມີການດໍາເນີນທຸລະກິດ ແຕ່ສອງແຂວງຂຶ້ນໄປໃນຂອບເຂດທົ່ວປະເທດ ແມ່ນ ກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນຜູ້ຄຸ້ມຄອງ. 
2. ການດໍາເນີນທຸລະກິດປ້າຍ ຂັ້ນແຂວງ, ນະຄອນຫຼວງ ໃຫ້ສະເໜີຕໍ່ພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ຂອງແຂວງ, ນະຄອນຫຼວງ; 
3. ການດໍາເນີນທຸລະກິດປ້າຍ ຂັ້ນເມືອງ ໃຫ້ສະເໜີຕໍ່ຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ, ເທດສະບານ. 

- ກິດຈະການປ້າຍ ຂອງວິສາຫະກິດ ຫຼື ບໍລິສັດ ທີ່ດໍາເນີນທຸລະກິດແຕ່ສອງແຂວງຂື້ນໄປໃນຂອບເຂດທົ່ວປະເທດ ແມ່ນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເປັນຜູ້ອະນຸມັດ. ການດໍາເນີນທຸລະກິດປ້າຍຂັ້ນແຂວງ, ນະຄອນຫຼວງ ໃຫ້ສະເໜີຕໍ່ພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. ການດໍາເນີນທຸລະກິດປ້າຍຂັ້ນເມືອງ ໃຫ້ສະເໜີຕໍ່ຫ້ອງການ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ. 
- ສໍາລັບການຕິດຕັ້ງປ້າຍໃຫ້ສະເໜີຕໍ່ຂະແໜງໂຍທາທິການ ແລະ ຂົນສົ່ງ ຕາມການແບ່ງຂັ້ນຄຸ້ມຄອງ.