ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ແລະ ນິຕິບຸກຄົນ ທີ່ຈະດໍາເນີນທຸລະກິດນຳທ່ຽວ ຕ້ອງມີເງື່ອນໄຂ ດັ່ງນີ້:
1. ເປັນບຸກຄົນ ຫຼື ນິຕິບຸກຄົນ ທີ່ໄດ້ຂຶ້ນທະບຽນວິສາຫະກິດ ຢ່າງຖືກຕ້ອງຕາມກົດໝາຍ ຂອງ ສປປ ລາວ;
2. ມີສໍານັກງານ/ຫ້ອງການ, ວັດຖຸອຸປະກອນ ທີ່ຖືກຕ້ອງຕາມລະບຽບການ ແລະ ມາດຕະຖານ; 
3. ມີພະນັກງານນໍາທ່ຽວປະຈໍາ ຫຼື ບໍ່ປະຈໍາ
4. ມີລາຍການທ່ອງທ່ຽວ ແລະ ລາຄາລາຍການທ່ອງທ່ຽວ
5. ມີໃບອະນຸຍາດດຳເນີນທຸລະກິດນຳທ່ຽວ;
6. ຕ້ອງມີທຶນຈົດທະບຽນຕາມເງື່ອນໄຂທີ່ໄດ້ກຳນົດໄວ້ໃນຂໍ້ຕົກລົງສະບັບນີ້;
7. ເປີດບັນຊີເງິນຝາກຢູ່ທະນາຄານທຸລະກິດ ຕາມກົດໝາຍ ແລະ ລະບຽບການທີ່ກ່ຽວຂ້ອງກຳນົດ;
8. ສຳລັບບຸກຄົນ ຫຼື ນິຕິບຸກຄົນຕ່າງປະເທດ ນອກຈາກປະຕິບັດຕາມຂໍ້ 1, 2, 3,4  ແລະ ຂໍ້ 5 ຂອງມາດຕານີ້ແລ້ວ ຕ້ອງມີເງິນຄ້ຳປະກັນ (Deposit Money) ຝາກຢູ່ທະນາຄານທຸລະກິດເປັນສະກຸນເງິນກີບ ບໍ່ຫຼຸດ 30% (ສາມສິບສ່ວນຮ້ອຍ) ຂອງທຶນຈົດທະບຽນທັງໝົດ.

ເອກະສານ ຂໍສະເໜີດໍາເນີນທຸລະກິດນໍາທ່ຽວ ມີ ດັ່ງນີ້:
1. ໃບຄໍາຮ້ອງຂໍອະນຸຍາດດໍາເນີນທຸລະກິດ 1 ໃບ;
2. ຂໍ້ມູນທີ່ຈໍາເປັນຕາມແບບຟອມຂອງກົມຄຸ້ມຄອງທຸລະກິດການທ່ອງທ່ຽວ;
3. ສຳເນົາ ໃບທະບຽນວິສາຫະກິດ 1 ໃບ;
4. ສຳເນົາ ສຳນວນຄໍາຮ້ອງຂໍຂຶ້ນທະບຽນວິສາຫະກິດ 1 ຊຸດ;
5. ຮູບຖ່າຍເຈົ້າຂອງວິສາຫະກິດ ຂະໜາດ 3x4 ຊມ 2 ໃບ ບໍ່ເກີນ 3 ເດືອນ

ການຂໍອະນຸຍາດສ້າງຕັ້ງ ແລະ ດໍາເນີນທຸລະກິດ ຮ້ານອາຫານ ແມ່ນຂະແໜງ ຖວທ ເປັນຜູ້ພິຈາລະນາໃນການອອກອະນຸຍາດ.

• ການແບ່ງຂັ້ນຄຸ້ມຄອງ 
- ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງ/ນະຄອນ ເປັນເຈົ້າການຄົ້ນຄວ້າພິຈາລະນາອະນຸຍາດການດໍາເນີນທຸລະກິດ, ການອະນຸຍາດການສືບຕໍ່ດໍາເນີນທຸລະກິດ ຕໍ່ຫົວໜ່ວຍທຸລະກິດນໍາທ່ຽວສະເພາະພື້ນທີ່ໃດໜຶ່ງ
- ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ/ນະຄອນຫຼວງ ຄົ້ນຄວ້າພິຈາລະນາອະນຸຍາດການດໍາເນີນທຸລະກິດ, ການອະນຸຍາດການສືບຕໍ່ດໍາເນີນທຸລະກິດ ຕໍ່ຫົວຫົວໜ່ວຍທຸລະກິດນໍາທ່ຽວພາຍໃນປະເທດ
- ກົມຄຸ້ມຄອງທຸລະກິດການທ່ອງທ່ຽວ  ຄົ້ນຄວ້າພິຈາລະນາ ອະນຸຍາດການດໍາເນີນທຸລະກິດ, ອະນຸຍາດການສືບຕໍ່ດໍາເນີນທຸລະກິດ ຂອງຫົວໜ່ວຍທຸລະກິດນໍາທ່ຽວລະຫວ່າງປະເທດ, ບໍລິສັດຕົວແທນທຸລະກິດການທ່ອງທ່ຽວ