ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທັງພາຍໃນ ແລະ ຕ່າງປະເທດ

(1) ຂະໜາດໂຮງໝໍເອກະຊົນ:
ໂຮງໝໍເອກະຊົນຕ້ອງປະກອບ ອຸປະກອນການເເພດ, ຕຽງນອນ, ຜູ້ປະກອບວິຊາຊີບປີ່ນປົວຕາມລະດັບຂັ້ນຂອງໂຮງໝໍເອກະຊົນ ແລະ ຕາມເງື່ອນໄຂມາດຕະຖານດັ່ງນີ້:
- ຂັ້ນ 1: ໂຮງໝໍຂະໜາດໃຫຍ່ຫລາຍກວ່າ 100 ຕຽງນອນຂຶ້ນເມືອ ໃນລະດັບການປິ່ນປົວຂັ້ນສູງສຸດ
- ຂັ້ນ 2: ໂຮງໝໍຂັ້ນກາງ 51-100 ຕຽງ ໃນລະດັບການປິ່ນປົວຂັ້ນສູງ
- ຂັ້ນ3: ໂຮງໝໍຂະໜາດນ້ອຍ 30-50 ຕຽງ ໃນລະດັບການປິ່ນປົວຂັ້ນກາງ.

(2) ບຸກຄະລາກອນໂຮງໝໍເອກະຊົນ:
- ຜູ້ອຳນວຍການຝ່າຍວິຊາການແພດຂອງໂຮງໝໍເອກະຊົນ ທີ່ຕ່າງປະ ເທດມາລົງທຶນດຳເນີນກິດຈະການໂຮງໝໍເອກະຊົນ ຕ້ອງມີທ່ານໝໍທີ່ເປັນສັນຊາດລາວ ຢ່າງໜ້ອຍ 01 ທ່ານ ທີ່ມີເງື່ອນໄຂ, ມາດຕະຖານທາງດ້ານວິຊາການ ແລະ ປະສົບການດ້ານການປິ່ນປົວ 10 ປີຂຶ້ນໄປ ເປັນພະນັກງານບຳນານ ຫຼື ບຳເນັດ.
- ວີຊາຊີບປິ່ນປົວທີ່ເຮັດວຽກໃນໂຮງໝໍເອກະຊົນ ທັງຄົນລາວ ແລະ ຄົນຕ່າງປະເທດ ຕ້ອງມີໃບຢັ້ງຢືນວິຊາຊີບປິ່ນປົວທີ່ອອກໃຫ້ໂດຍ ກະຊວງສາທາລະນະສຸກ.
- ການນຳເອົາຜູ້ປະກອບວິຊາຊີບປິ່ນປົວ, ນັກເຕັກນິກອື່ນໆທີ່ເປັນຄົນຕ່າງປະເທດເຂົ້າມາປະຕິບັດວິຊາການໃນໂຮງໝໍເອກະຊົນ ອະນຸຍາດໃຫ້ບໍ່ເກີນ 20% ຂອງຈໍານວນທັງໝົດ.
- ການບັນຈຸພະນັກງານເຂົ້າໃນໂຮງໝໍເອກະຊົນ ມີດັ່ງນີ້:
* ຂັ້ນ 1: ຈໍານວນພົນໃນອັດຕາ 2,5-3 ຄົນຕໍ່ຕຽງ, ທ່ານໝໍ 1ຄົນ ຕໍ່ພະຍາບານ 4-5 ຄົນ, ທ່ານໝໍ 1 ຄົນ ຕໍ່ 4 ຕຽງ.
* ຂັ້ນ 2: ຈໍານວນພົນໃນອັດຕາ 2-2, 5-3 ຄົນຕໍ່ຕຽງ, ທ່ານໝໍ 1 ຄົນ ຕໍ່ພະຍາບານ 5 ຄົນ, ທ່ານໝໍ 1 ຄົນ ຕໍ່ 5 ຕຽງ
* ຂັ້ນ 3: ຈໍານວນພົນໃນອັດຕາ 1,8 – 2 ຄົນຕໍ່ຕຽງ, ທ່ານໝໍ 1 ຄົນ ຕໍ່ພະຍາບານ 3-4ຄົນ, ທ່ານໝໍ 1 ຄົນ ຕໍ່ 5 ຕຽງ.

(3) ເງື່ອນໄຂ ແລະ ມາດຕະຖານໂຮງໝໍເອກະຊົນ:
- ການລົງທືນຂອງຕ່າງປະເທດສາມາດຮ່ວມທຶນຈົດທະບຽນຮ່ວມກັບ ບຸກຄົນ, ນິຕິບຸກຄົນ ພາຍໃນປະເທດ ເພື່ອຂໍອະນຸຍາດດຳເນີນກິດຈະການໂຮງໝໍເອກະຊົນ ຕ້ອງມີອັດຕາສ່ວນການລົງທຶນຫຼາຍກວ່າ 49% ຂຶ້ນໄປຂອງທຶນທັງໝົດໃນການສ້າງຕັ້ງໂຮງໝໍເອກະຊົນ.
- ສະຖານທີ່ຕັ້ງຂອງໂຮງໝໍເອກະຊົນຕ້ອງຢູ່ຫ່າງຈາກບ້ານປະຊາຊົນ ຢ່າງຫນ້ອຍ 30-50 ແມັດ, ມີຮົ້ວ ຫຼື ກໍາແພງຮອບແດນ, ມີລະບົບບຳບັດນໍ້າເສຍ, ຮັບປະກັນນໍ້າເປື້ອນ ໃຫ້ອອກສູ່ລະບົບລະບາຍນໍ້າເສຍຂອງຕົວເມືອງ, ມີລະບົບກຳຈັດທຳລາຍສີ່ງທີ່ເປິະເປື້ອນ, ຮັບປະກັນບໍ່ໃຫ້ມີຜົນສະທ້ອນດ້ານມົນລະພິດເຖີງຜູ້ຢູ່ໃກ້ຄຽງ ແລະ ສະພາບແວດລ້ອມ.
- ເນື້ອທີ່ດິນປຸກສ້າງໂຮງໝໍເອກະຊົນ:
* ຂັ້ນ 1: ເນື້ອທີ່ດິນປຸກສ້າງບໍ່ຕໍ່າກ່ວາ 5.000 ຕາແມັດ, ອາຄານສູງບໍ່ເກີນ 5 ຊັ້ນ, ຕັ້ງຢູ່ເທດສະບານຂອງແຂວງໃຫຍ່.
* ຂັ້ນ 2: ເນື້ອທີ່ດິນປຸກສ້າງບໍ່ຕໍ່າກ່ວາ 4.000 ຕາແມັດ, ອາຄານສູງບໍ່ເກີນ 4 ຊັ້ນ, ຕັ້ງຢູ່ເທດສະບານຂອງແຂວງທີ່ບໍ່ໃຫຍ່.
* ຂັ້ນ 3: ເນື້ອທີ່ດິນປຸກສ້າງບໍ່ຕໍ່າກ່ວາ 3.000 ຕາແມັດ, ອາຄານສູງບໍ່ເກີນ 2 ຊັ້ນ, ຕັ້ງຢູ່ບັນດາເມືອງຕ່າງໆ.           

1.ຂັ້ນຕອນການດຳເນີນກິດຈະການຂອງໂຮງໝໍເອກະຊົນ (ການຂໍອະນຸຍາດລົງທຶນ)
- ບຸກຄົນ, ນິຕິບຸກຄົນ ທັງພາຍໃນ ແລະ ຕ່າງປະເທດທີ່ມີຈຸດປະສົງສາງຕັ້ງ ແລະ ເຄື່ອນໄຫວບໍລິການໂຮງໝໍເອກະຊົນ ຕ້ອງປະຕິບັດຕາມກົດໝາຍສົ່ງເສີມການລົງທຶນ ແລະ ກົດໝາຍອື່ນທີ່ກ່ຽວຂ້ອງ ແລະ ຕາມຂັ້ນຕອນ ຕ້ອງຍື່ນເອກະສານຂໍລົງທຶນນຳກະຊວງແຜນການ ແລະ ການລົງທຶນ ແລະ ປະກອບເອກະສານລົງທຶນຕາມແບບຟອມຂອງການຂໍລົງທຶນທີ່ກະຊວງແຜນການ ແລະ ການລົງທຶນ ອອກໃຫ້, ກະຊວງແຜນການ ແລະ ການລົງທຶນ ຈະສົ່ງເອກະສານມາໃຫ້ກະຊວງສາທາລະນະສຸກ ຄົ້ນຄວ້າພິຈາລະນາ, ພ້ອມດຽວກັນເຈົ້າຂອງລົງທຶນຕ້ອງປະກອບເອກະສານຕາມແບບພິມຂອງກະຊວງສາທາລະນະສຸກ (ເອກະສານຊ້ອນທ້າຍ 1), ພາຍຫຼັງໄດ້ຄົ້ນຄວ້າມີຄຳເຫັນແລ້ວ ກະຊວງສາທາລະນະສຸກຈະສົ່ງຄຳເຫັນໄປໃຫ້ກະຊວງແຜນການ ແລະ ການລົງທຶນ ພາຍໃນ 8-9 ວັນລັດຖະການ (ຖ້າມີເອກະສານຄົບຖ້ວນ), ຖ້າເອກະສານບໍ່ຄົບຈະແຈ້ງຕອບສົ່ງກັບຄືນບໍ່ກາຍ 15 ວັນລັດຖະການ. 
- ເມື່ອເຈົ້າຂອງລົງທຶນໄດ້ຮັບໃບອະນຸຍາດລົງທຶນຈາກກະຊວງແຜນການ ແລະ ການລົງທຶນ ແລະ ເອກະສານຈາກຂະແໜງການອື່ນທີ່ກ່ຽວຂ້ອງກັບການຂໍອະນຸຍາດປຸກສ້າງໂຮງໝໍແລ້ວ, ພາຍໃນກຳນົດ 90 ວັນ ຕ້ອງມີການເຄື່ອນໄຫວ ແລະ ດຳເນີນການກໍ່ສ້າງໂຮງໝໍ ຕາມລະບຽບການ

2. ຂັ້ນຕອນການຍື່ນຄຳຮ້ອງຂໍດຳເນີນກິດຈະການໂຮງໝໍເອກະຊົນ (ເປີດບໍລິການເປັນທາງການ)
ພາຍຫຼັງສຳເລັດການປຸກສ້າງຕຶກອາຄານໂຮງໝໍ, ປະກອບເຄື່ອງມື-ອຸປະກອນການແພດ ຄົບຊຸດ ແລະ ບຸກຄະລາກອນຄົບຖ້ວນ, ຜູ້ລົງທຶນຕ້ອງໄດ້ເຮັດຄຳຮ້ອງຕາມແບບພິມຂອງກະຊວງສາທາລະນະສຸກອອກໃຫ້ (ເອກະສານຊ້ອນທ້າຍ 2). ຫຼັງຈາກນັ້ນ, ກະຊວງສາທາລະນະສຸກຈະໄດ້ລົງກວດກາຄວາມພ້ອມຂອງໂຮງໝໍກ່ອນອອກໃບອະນຸຍາດສ້າງຕັ້ງ ແລະ ເຄື່ອນໄຫວບໍລິການໂຮງໝໍເອກະຊົນ ເປັນທາງການ.