ຖານຂໍ້ມູນດ້ານລະບຽບການຂໍອະນຸຍາດດຳເນີນທຸລະກິດ

ບຸກຄົນ ຫຼື ນິຕິບຸກຄົນ ທີ່ມີຈຸດປະສົງປຸກສ້າງອາຄານ ຫຼື ສິ່ງປຸກສ້າງຕ່າງໆ ຊຶ່ງລວມມີ: 
1. ການສ້າງ ແລະ ຕິດຕັ້ງ
2. ການຕໍ່ເຕີມ ແລະ ການປ່ຽນແປງເປົ້າໝາຍການນຳໃຊ້
3. ການບູລະນະ ແລະ ປະຕິສັງຂອນ
4. ການທັບມ້າງ ແລະ ສ້ອມແປງ

1. ແບບການກໍ່ສ້າງ ຕ້ອງຖືກຕ້ອງສອດຄ່ອງກັບມາດຕະຖານເຕັກນິກ ແລະ ສອດຄ່ອງກັບ ແຜນຜັງ ເມືອງ ແລະ ລະບຽບການທີ່ກ່ຽວຂ້ອງ ເຊັ່ນ: ແຜນຜັງຊີ້ນໍາລວມ, ແຜນຜັງແບ່ງເຂດ ແລະ ລະບຽບ ການນໍາໃຊ້ທີ່ດິນສະເພາະ ລວມທັງ ລະບຽບການ ກ່ຽວກັບ ການຄຸ້ມຄອງຕົວເມືອງ ແລະ ການປຸກ ສ້າງ, ການອະນຸລັກສະຖາປັດຕະຍະກໍາ, ສິ່ງແວດລ້ອມ ແລະ ອື່ນໆ
2. ຕ້ອງມີໃບຕາດິນ
3. ສຳລັບຜູ້ທີ່ມີສິດນຳໃຊ້ທີ່ດິນແຕ່ໂຄງການໃບຕາດິນບໍ່ທັນໄປເຖີງ ແມ່ນຈະດຳເນີນການພິຈາລະນາຕາມແຕ່ລະກໍລະນີ

1. ຫ້ອງການປົກຄອງແຂວງ/ນະຄອນຫຼວງເປັນຜູ້ອະນຸມັດສິ່ງປຸກສ້າງລະດັບ 1 ເຊິ່ງປະກອບມີ ສິ່ງປຸກສ້າງຂະໜາດໃຫຍ່ ທີ່ມີເນື້ອທີ່ 10,000 ຕາແມັດ, ຄວາມສູງເກີນ 20 ແມັດ,  ເປັນປະເພດອາຄານຄວບຄຸມ, ໂຮງງານອຸດສະຫະກຳ ແລະ ຫັດຖະກຳປຸງແຕ່ງລະດັບ 3 ແລະ 2, ການປຸກສ້າງທີ່ມີຜົນກະທົບຕໍ່ສິ່ງແວດລ້ອມ
2. ພະແນກໂຍທາທິການ ແລະ ຂົນສົ່ງແຂວງເປັນຜູ້ອະນຸມັດການປຸກສ້າງສິ່ງປຸກສ້າງລະດັບ 2 ເຊິ່ງປະກອບມີ: ສິ່ງປຸກສ້າງຂະໜາດກາງ ທີ່ມີເນື້ອທີ່ 400 ຫາ 10,000 ຕາແມັດ, ຄວາມສູງເກີນ 10 ຫາ 20 ແມັດ,  ປ້ຳນ້ຳມັນເຊື້ອໄຟທຸກລະດັບ, ໂຮງງານອຸດສະຫະກຳ ແລະ ຫັດຖະກຳປຸງແຕ່ງລະດັບ 1, ການປຸກສ້າງທີ່ມີຜົນກະທົບຕໍ່ສິ່ງແວດລ້ອມ, ລະບົບເສົາໂທລະຄົມ ແລະ ສື່ສານ, ເສົາໄຟຟ້າຂະໜາດໃຫຍ່, ປ້າຍໂຄສະນາສິນຄ້າຂະໜາດໃຫຍ່ (ປ້າຍ LED ທຸກປະເພດ, ປ້າຍຕິດຕັ້ງແຄມທາງຂະໜາດ 2x4 ແມັດຂຶ້ນໄປ).
3. ຫ້ອງການໂຍທາທິການ ແລະ ຂົນສົ່ງເປັນຜູ້ອະນຸມັດການປຸກສ້າງສິ່ງປຸກສ້າງລະດັບ 3 ເຊິ່ງປະກອບມີ: ສິ່ງປຸກສ້າງຂະໜາດນ້ອຍສະເພາະທີ່ຢູ່ອາໄສ ເນື້ອທີ່ບໍ່ເກີນ 400 ຕາແມັດ, ຄວາມສູງບໍ່ເກີນ 10 ແມັດ ແລະ ປ້າຍໂຄສະນາສິນຄ້າແຄມທາງຂະໜາດນ້ອຍ (ບໍ່ເກີນ 2x4 แແມັດ)

ໜ່ວຍງານກ່ຽວຂ້ອງຈະໄດ້ລົງຕິດຕາມກວດກາການປຸກສ້າງທີ່ຕົນອະນຸມັດ ຢ່າງໜ້ອຍ 2 ຄັ້ງ ກ່ອນການປຸກສ້າງສໍາເລັດ  
ຫຼັງຈາກປຸກສ້າງໄດ້ສໍາເລັດແລ້ວ, ຜູ້ໄດ້ຮັບອະນຸຍາດຕ້ອງແຈ້ງໜ່ວຍງານກ່ຽວຂ້ອງຊາບ ພາຍໃນກໍານົດເວລາບໍ່ເກີນ 15 ວັນ ເພື່ອລົງກວດກາເທື່ອສຸດທ້າຍ ແລະ ອອກໃບຢັ້ງຢືນຄວາມ ຖືກຕ້ອງໃຫ້ ເພື່ອເປັນຫຼັກຖານຈົນກວ່າສິ່ງປຸກສ້າງດັ່ງກ່າວ ຈະມີການປ່ຽນແປງໃໝ່.